最近由於工作地點有改變，啱啱搬完新辦公室， 雖然租金貴咗一啲， 地方又細咗一啲，距離地鐵站又遠 左一啲， 不過由我屋企樓下出發， 剛好有巴士同小巴，只係需要十幾分鐘車程， 就可以過去新辦公室， 對於我嚟講，交通反而方便左。 新地方樓下仲有好多嘢食， 要試晒全部嘅餐廳， 都應該要花一點時間， 由於搬屋用咗好多時間， 手頭上畫緊嘅稿都要暫停一下， 希望嚟到新辦公室， 可以集中少少畫公仔。就物色地方嘅問題， 風水方面都有少少心得， 就同大家分享吓。
設計師要識風水
多人係買樓或者租樓嘅時候，唔少都會關注吓風水嘅問題， 一啲富豪級別嘅人， 通常一定會請風水師睇過，先至起樓或者裝修。香港識風水嘅人，除咗風水師同埋地產經紀之外，一定係同建築相關嘅設計師，畢竟你賣個設計俾人嘅時候， 都要有返咁上下理據去說服你嘅客人， 如果唔係當個客喺裝修完之後，搵風水師一睇， 發現裝修嘅物料有相沖，或者隻顏色唔旺佢嘅時候，就麻煩了。 所以喺香港做建築設計或者室內設計多多少少都會有一啲風水知識傍身， 以防遇上以上嘅情況，搵食艱難，喺香港讀設計真係要乜嘢都識。
話晒都算係一個設計師， 所以唔多唔少識得一啲風水係應份嘅事。最近喺度搬工作室 , 喺香港搵一個風水好嘅地方係唔係咁容易， 尤其係當你資金有限嘅時候， 通常除咗凶宅之外， 好似並沒有太多嘅選擇， 但係香港就算係凶宅， 租金都唔平。 年頭嘅時候我開始學風水，術數呢啲嘢一理通百理明， 由於之前有八字同埋卜卦嘅根底喺度，所以學起上嚟並唔係太困難， 最近適逢工作地點有改動， 所以我要離開原本嘅工作室， 搵個另外一個新地方。 當我開始去唔同嘅地方睇樓嘅時候， 就諗呢個應該就係最好嘅風水實習時機。但係，當我開始睇唔同嘅樓盤嘅時候， 先至發現原來揀一個好嘅地方係幾咁困難嘅事。
風水的本質
關於風水嘅定義， 可以參照晉朝郭璞的《葬經》：「氣乘風則散，界水則止。古人聚之使不散，行之使有止，故謂之風水。 」， 簡單啲嚟講係指 一個地方「氣」嘅流動， 當然包括一個地方到底空氣流唔流通。 坊間話風水呢樣嘢，信則有不信則無， 其實邊度有咁複雜？ 一個地方嘅空氣同埋通風系統好壞， 已經係風水嘅一部份。 風水嘅原意， 係令到入咗間屋企人可以保持精神， 入到去住得舒服， 當你個人頭腦清醒， 身體健康，自然就更容易賺到多啲錢。到底入咗哩間屋嘅人， 同個地方嘅氣場夾唔夾都有好大嘅學問， 所以師傅通常要 計埋個屋主嘅生辰八字， 同埋屋企究竟住咗啲乜嘢人先至作出決定， 就比如 一間屋有一啲方位文昌特別好， 但係將要搬入去住嘅人 根本就冇人讀緊書， 就變咗得物冇所用。
趨吉避凶
風水師亦都會放一啲類似裝飾嘅嘢， 用嚟改變一啲唔好嘅氣場， 但係到底放啲乜嘢， 除咗物料之外，可能同宗教有關， 一般人唔太接受嘅可能就係呢個位，畢竟求其擺個風水陣就可以趨吉避凶，或者財源滾滾，呢件事太過超乎常理， 一般人理智上 並唔係咁容易接受。 風水來來去去都係講緊氣場對於我哋人嘅影響， 包括心理同埋生理方面， 但係氣場呢啲嘢畢竟係比較抽象， 佢又唔似Wi-Fi， 雖然你睇唔到， 但係起碼上到網你就 即刻知佢有， 放水嘅話，如果呢達地方嘅氣場好， 通常都要過一段時間先至會見效（當然啦，好嘅風水師如果即刻糾正到問題， 就會好快見效。）
科唔科學
風水嘅計算方法， 同依家西方嘅數學非常之唔同， 譬如有一啲屋，如果女人住入去就冇乜問題， 但係如果係男人住就好容易出事， 乍看之下，會認為呢啲係怪力亂神， 但係以中國嘅方式， 一間屋嘅氣場， 可能淨係適合某一個性別嘅人， 女人 住得舒服，唔等於男人都一樣， 咁係因為大家天生身體嘅構造就唔一樣。或者有啲屋雖然住咗入去之後比較容易賺錢， 適合年輕人居住，但係就唔係咁適合老人家， 咁係因為老人家身體虛弱， 承受唔到返屋企壓力等等。 根據中國嘅文化， 好多嘢其實係有解釋， 但係佢會懶得寫， 令到後面嘅人淨係知道答案， 唔清楚中間嘅過程， 缺失嘅嗰一部份連用緊嘅人都未必太清楚原理係啲乜嘢， 自然就會向怪力亂神嘅方向諗， 其實係計算過程之中， 好多嘢係需要計數， 只係嗰一條數同我哋西方嘅教學非常唔同， 就會變成 一般人認為嘅偽科學或者係迷信。當然， 當中亦有一啲事係比較難解釋， 譬如話如果屋企嘅大門前面有種植樹木， 會比較容易招惹陰靈， 但係依家科學上仲未好確切地證實到陰靈存在， 就好容易形成我哋認知上嘅盲點， 不過如果有一日有確切嘅證據證明呢個世界上有陰靈， 咁就突然解得通， 成件事科學晒。
時代嘅變遷
好多風水秘笈都係以前古代嘅時候流傳落嚟， 以前啲人起屋都係得一兩層， 人口密度又低， 有就有山， 又要有水，要睇巒頭都唔算難， 照住本古書揀就得，唔同依家香港地人口密集， 高樓大廈林立， 樓宇同埋樓宇之間嘅空間都係非常之狹窄， 搵個空氣流通啲嘅地方都好難。 風水好重視門口同埋窗嘅方向， 現代嘅樓宇都係你買完之後先至住入去， 根本就冇乜機會去決定門口同埋窗應該點樣開， 最後只可以 用其他地方作出相應嘅補救， 所以風水理論都係要根據時代的變遷作出一啲改進， 就我所知，各家各派嘅風水理論其實都有啲唔同。 喺大城市入邊要搵一個好地方做安樂窩，都需要咁上下運氣， 雖然話風水最勁嗰招， 就係搬屋， 但係香港地要搬屋或者玩樓都唔係一件輕鬆嘅事。
最後，就算俾你遇到都要你嘅財力負擔得起， 最後發現其實冇一間屋係完美嘅， 就正如呢個世界上冇一個人係完美嘅一樣， 就係要識得取捨， 好難全部都要晒， 隨緣咁樣搵一間， 自己入去覺得舒服咁就可以了。
這篇文章 選擇一個有緣份的地方 最早出現於 漫畫家的哲學。
