恭喜小靈出版了第一本個人漫畫《親愛的44號》!
隔咗好耐先至有時間畫賀圖， 現在《第二屆港漫動力》的活動應該都差唔多嚟到尾聲， 我今年係以幫手嘅角度嚟參與呢一場活動，《親愛的44號》嘅內容創作部份我冇參與， 因為知道ling姐自己搞得掂， 今次我只係提供一啲技術支援，順便喺旁邊食吓花生咁， 都係一種樂趣。
諗返起上年我自己參加第一屆嗰陣時， 除咗要畫稿，仲要挑戰自己寫報告、 搵印刷廠同發行、 搞宣傳之類，好多事情都係自己嘅知識範圍以外， 尤其是對於書本市場嘅運作， 我都係第一次自己落手落腳做，可以話係打開咗新世界嘅大門，只可以靠自己慢慢摸索。雖然知道喺香港做創作，不嬲都係要親力親為， 不過要喺半年咁短時間之內完成晒所有嘅事情，如果冇人幫手，都真係十分吃力， 所以最後， 雖然平時已經慣咗所有嘢都自己親力親為， 但係係有時間嘅限制之下， 都一定要妥協請人幫手， 於是我就搵咗ling姐， 請佢幫手做《明夷之國》的上色同背景， 因為係識得嘅人入邊， 佢的效率最好。（不過都由於平時唔習慣同人夾份一齊做嘢， 初頭都混亂咗一排XDD）
喺活動期間，我就建議LING姐不如都去參加港漫動力，事源係舊年幫佢算命之後， 發現佢今年運氣唔錯， 尤其是係驛馬動，就叫佢參加應左條命， 而佢最後又真係成功入咗第二屆（話說面試之前我都有幫大家卜卦，有搵我卜的都入左）
Ling姐畫稿一向都很快，見證住Ling姐由申請港漫動力開始、 諗劇本、 寫報告，到完成漫畫嘅過程，基本上都係遊刃有餘，所以從來都冇質疑過ling姐會完成唔到，我都試吓用上年嘅經驗同埋渠道幫吓手咁， 因為知道係半年期間要專注畫漫畫已經好辛苦， 其他嘢如果可以煩少啲 行少啲冤枉路， 都應該已經唔錯。最後，《親愛的44號》 成績好理想， 再次祝賀小靈嘅作品大賣，也預祝馬來西亞嘅展覽順利！
《親愛的44號》 其中一個最令我驚訝嘅地方， 就係ling姐居然會畫小妹妹， 平時見開佢畫大胸嘅姐姐， 完全想像唔到。
賀圖最後畫左艾美，可能係因為受到呢本漫畫D 怪物嘅詛咒， 係畫完呢張圖之後， 我都變咗做一隻眼， 同啲怪物做同伴。
幫小靈宣傳一下網頁， 最重要嘅係記得買書!!
https://artlingstudio.com
